नेपाली हास्यव्यङ्ग्य अनलाइन पत्रिका

खगेन्द्र नेउपाने :

थुइक्क !
कुकुर पाल्नुपर्ने रहेछ
गाई पालेर इज्जत गो
डोर्‍याएर सडकमा दिसा गराउँनु हुन्थ्यो
भकारो सोहोर्नलाई हैरान भो ।

कुकुर पाल्नुको सान बेग्लै
अतिथि आउँदा घ्वाङ्ग भुकिदिने
घरमा कुकुर हुनुको मान बेग्लै
पाउमा लुटुपुटु भएर झुकिदिने
भान्सामा काखमा राखेर सँगै खान हुने
गाडीमा बसाएर सँगै लान हुने
वा !! क्या गज्जब !
थुइक्क !
कुकुर पाल्नु पर्ने रहेछ !

गाई पाल्नेलाई कसैले हेर्दैन
दुध किनीदिनोस्न भन्दा पनि टेर्दैन
गोठमा गाई बाँधें भन्छु
गाईले पो आफैंलाई बाँध्दो रैछ
दुध किन्ने संस्था डेरी (टेडी ?) रैछ
त्यसैले होला
पैसा माग्न जाँदा आँखा पल्टाएर हेर्छ
जुन दिनदेखि मैले गाई पालेँ
यस्तो लाग्छ मैले इज्जत फालेँ
थुइक्क !
कुकुर पाल्नुपर्ने रहेछ !

मन्त्रीदेखि हाकिमसम्म
चढेका छन् गाडी सडकमा टम्म
काखमा राख्छन् कुकुर एउटा
उनै मालिक उनै छन् देउता
नव धनाढ्य सिको गर्छ
किन्छ कुकुर व्यक्तित्व विज्ञापनको फारम भर्छ
कुकुर पाल्न नसक्ने हीन जाति
दुनियाँ यसकै पक्षपाति
गाई पाल्ने हरामखोर
यस्तै यहाँको चल्ती स्वोर
थुइक्क ! कुकुर पाल्नु पर्ने रहेछ !

०००
गौरादह, झापा