नेपाली हास्यव्यङ्ग्य अनलाइन पत्रिका

कविराज घिमिरे :

छ जो शत्रु आफ्नो सबै एक हुन्छन्
सुनैको खलोमा सबै लट्पटिन्छन्
मिली रोप्न थाल्छन् सुनै पो विचित्र
सुनै मात्र फल्ने भयो देशभित्र ॥१

सुनैको छ खाना सुनैको छ नाना
सबै ढोल झ्याम्टा सुनैका बजाना
युवादेखि पाका सुनै यत्रतत्र
सुनै मात्र फल्ने भयो देशभित्र ॥२

छ साथी सुनैको र वैरी सुनैको
र भन्सार चोखो पहेँलै सुनैको
कतै छैन खाली जिमीभित्र चित्र
सुनै मात्र फल्ने भयो देशभित्र ॥३

न जोत्ने छ लेठा न पानी दिने हो
न बाढी न पैह्रो न चिन्ता लिने हो
दलालीहरूकै लगानी छ यत्र
सुनै मात्र फल्ने भयो देशभित्र ॥४

यहाँ बाउसे छन् ठुला कारवाला
र रोपारका छन् मुठे झ्याप्प बाला
यिनैले बनाए सुनैभित्र मित्र
सुनै मात्र फल्ने भयो देशभित्र ॥५

समातेर देखाउँदा हुन्न साँडे
छ लाठे त्यहाँ झन् उही आलुपाँडे
त्यसैले बढ्यो झन् अहा ! गर्भपत्र
सुनै मात्र फल्ने भयो देशभित्र ॥६

०००
भक्तपुर ।