नेपाली हास्यव्यङ्ग्य अनलाइन पत्रिका

कविराज घिमिरे :

खस्छन् तप्प निधारबाट पसिना भ्याई नभ्याई कुदेँ ।
पैसा खर्च गरेर धन्न बलले उम्मेदवारी बुझेँ ॥
छन् पार्टी तहमा जुझारु जन ती विद्रोह गर्छन् सुन ।
गर्दा खर्च समेत हुन्न सजिलो गार्‍हो छ नेता हुन ॥१

नेताले सुरुमा लिए नगद जो त्यो बाध्यता नै थियो ।
विद्रोही अब ठिक्क पर्दछ यता खेल्दै छ डन्डीबियो ॥
जो हो स्वार्थविहीन स्वच्छ गतिलो सक्तैन है धाउन ।
पैसाले नथिचे कदापि सजिलै गाह्रो छ नेता हुन ॥२

डुल्दा टोल र गाउँमा घरघरै ती कार्यकर्तासँग ।
ख्वाई मासु र भात मादक कुरा पैसा गए कञ्चन ॥
लावा लस्कर छन् हटाउन यहाँ को सक्तछन् ती घुन ।
उठ्ला खर्च कहाँ डुबेँ म अहिले गाह्रो छ नेता हुन ॥३

बेच्छन् भोट उता खुरुक्क जनता को सक्छ सम्झाउन ।
मोलामोल गरेर टप्न नसके फर्किन्न आफ्नो धन ॥
के साह्रो जनता चलाख अब झन् खुत्रुक्क पार्छन् जुन ।
बारी खेत सबै सरक्क सकियो गाह्रो छ नेता हुन ॥४

गर्ला क्याप्चर भोट हार्छ जसले रोक्नैपर्‍यो त्यो पनि ।
नाना छन् अझ धाँधली मतबिसे जान्नैपर्‍यो त्यो पनि ॥
ए गाँठे ! कतिसम्म उत्रिन कडा चर्को परीक्षा गुन ।
यी खाल्डा कसरी भरूँ म नमरी गाह्रो छ नेता हुन ॥५

हाम्रो नीति खराब हो कि अथवा दाम्रो व्यवस्था भयो ।
बिग्रेको तलसम्म हाल किन हो सच्चिन्छ या मर्छ यो ॥
भ्रष्टाचार बढेर राष्ट्र सकियो निष्पक्ष मान्छे चुन ।
पैसा खर्च गरेर व्यर्थ छ बुझौँ गाह्रो छ नेता हुन ॥६

मन्त्री सांसद होस् कि वा प्रमुख होस् त्यो पालिकाको कतै ।
के गर्ला र विकास हेर जन हो पैसा उठायो निकै ॥
चाँजो पार्छ समातिँदैन कहिलै उठ्तै छ आयो पुनः ।
यस्तो कर्म सकेन गर्न जसले गाह्रो छ नेता हुन ॥७

०००
भक्तपुर ।