नेपाली हास्यव्यङ्ग्य अनलाइन पत्रिका

भीम गौतम :

बाँकी रहेन कहीं कतै
उसको ठगी पाखण्डी
राक्षसी दाँतले चिलेको,
निष्ठा मरेको,
प्रतिष्ठा हराएको,
उसको लुब्ध भावले
उपल्लो क्षितिजमा पनि
यहींबाट ठग्ने, लुट्ने र
चियोचर्चोको योजना बनाउँछ ।

कुहिएको हस्को आइरहेको आवाज
वातावरण बिगारी रहन्छ,
चोरीका छिद्रहरू खोजिरहन्छ ।
गिद्धका तेजी नजरले
माथिबाटै सिनो देखेझैँ
जब मौकाको चौका देख्छ
उसको मुखभरि विषको र्‍याल भरिन्छ ।

गोमन र मलसाँप्रो बनी
निर्दोष मौरीको घार डस्न पुग्छ ।
आत्मीय प्रेममा रमाएर
घुर्र घुर्र गरिरहेका परेवालाई
झम्टा मार्दै
लछार्दै पछार्दै
प्रेममय गुणको रूप बिगार्दै
क्रोधी उसका नङ्ग्रा, दाँत
रातो रगत
पसिनाको साम्राज्यमा ।

०००
भरतपुर, चितवन ।
२०७६/०३/१६