नेपाली हास्यव्यङ्ग्य अनलाइन पत्रिका

देवीप्रसाद मिश्र :

नेतामा हुन्छ आफ्नै छलकपट कला सत्य खासै हुँदैन ।
सोझासाधा अनेकौँ कमसल मनका भावनाले छुँदैन ॥
लेख्ने साहित्य कोही टुटफुट बनिए साधना नै रुनेछ ।
नेता जस्तै सबैले कलहतिर बढे देश खोक्रो हुनेछ ॥१॥

नेता छन् दाइ मेरा खसखस कविता लेख्दछौ व्यर्थ भाइ,।
भन्दैछन्, राष्ट्र हाँक्ने विषय अति कडा लाग्न थाल्यो मलाई ॥
कालो धन्दा नगर्दा समय समयमा पेट हाम्रो रुनेछ ।
नेता जस्तै सबैले कलहतिर बढे देश खोक्रो हुनेछ ॥२ ॥

के राख्छौ नित्य साजी कथन हृदयका व्यर्थमा न्याय भाषा ?।
जत्था गुन्डा पुरानो अबसँग नरहे गुम्न लाग्दै छ पासा ॥
पासा थाम्नेछ आशा कलछल बलले न्याय आफैँ रुनेछ ।
नेता जस्तै सबैले कलहतिर बढे देश खोक्रो हुनेछ ॥३॥

भ्रष्टाचारी लगायौ कतिपयसँगका मित्रलाई कलङ्क ।
सर्वात्मा राष्ट्र हाँक्ने जन यति नलुटे फुक्न को सक्छ शङ्ख ?॥
भर्छौ शब्दार्थ तिम्रा लयसित बहुधा शब्द आफैँ रुनेछ ।
नेता जस्तै सबैले कलहतिर बढे देश खोक्रो हुनेछ ॥४॥

कुर्सी प्यारो छ मेरो हलचल नगरी बस्छु खाँबो समाई ।
खोज्दैे छन् झार्न केही गुटउपगुटले पाखुरामा समाई ॥
गर्दै छन् सत्य खोजी सकलजन त्यता सत्य आफैँ रुनेछ ।
नेता जस्तै सबैले कलहतिर बढे देश खोक्रो हुनेछ ॥५॥

०००
२०८०/६/२०