नेपाली हास्यव्यङ्ग्य अनलाइन पत्रिका

खगेन्द्र नेउपाने :

बिचरा भेडाहरू
कैयौँ गल्छी काटेर
कैयौँ अप्ठ्यारा
ढुङ्ग्यान पहराहरू चाटेर
हर्हर प्यासलाई आँतभरि साँध्दै
अगाडि बढिीरहेछन्
आफैँ काटिने शहरमा ।

हे भगवान ! किन भेडा बनायौ ?
हिउँले खङ्ग्रङ्ग पारेका पाखाहरूमा किन जन्मायौ ?
हिमालको चिसो छहारीमा
धूपीबारीमा
ढुङ्गा घारीमा
किन संसार देखायौ ?
किन अभावमा सेकायौ ?
तिम्रो न्यायको अन्यायी सडक पार गरेर
अगाडि बढिरहेछन्
आफैं काटिने शहरमा ।

हिमालको उसपारबाट
हिमालको यसपार
बालापनको उससंसारबाट
मृत्युदेशको यस संसारमा
हुलहरूमा डोरिएर
मोलमोलाइको साधन भएर
एकोहोरो डोहोरिरहेछन् भेडाहरू
आफैं काटिने शहरमा ।

उसले भन्यो
भेडाहरू भेडै भएर काटिने हुन्
आफ्नो सर्वस्व अरुकै लागि दिने हुन्
चेतनाको पछिल्लो पङ्क्तिमा परेपछि
उसको भाग्यमा विधाताको तुषारो झरेपछि
उसले काटिनुपर्छ
आफ्नो ज्यान दिने समूहबाट फाटिनुपर्छ
यसरी नै युगयुगदेखि
भेडाहरू भेडा हुनुको भाग्य बोकेर
डोहोरिरहेछन्
राजनीतिक सीमाना पार गरेर
हिमालको उचाईबाट तल झरेर
एकोहोरिरहेछन्
आफैं काटिने शहरमा ।

०००
गौरादह, झापा