नेपाली हास्यव्यङ्ग्य अनलाइन पत्रिका

घनश्याम रेग्मी :

जताततै बढेको छ दसैँ रन्को तरङ्गिँदै
खाने र लाउने मात्रै झुन्डिएको यहाँ सधैँ।
भित्री आँत जसो जे होस् ढाँचा ढर्रा बढाउनु
लागेमा ऋण नै लागोस् अलि फुर्ती बढाउनु ।

टाढाका छुट्टीमा आए जागिरे घरमा फिरे
त्यसैले पनि हो हल्ला छिमेकी बासमा अरे ।
गाडीमा खानका वस्तु झार्दै हेर्दो छ माहिलो
घोर्ले खसी लिई पुग्ने कान्छो लाहुरतर्फको ।

वल्ला पल्ला घरे धेरै फूर्ती गर्ने भए पछि
यो छिमेकी छ जागेको दसैँ भित्र घुसे पछि ।
निस्तो भात चबाएर बसेको घरमा थिएँ
चिची पापा भनी रुन्छन् यी केटाकेटी ब्युँझिएँ ।

छिमेकीसँगमा पैसा ऋण काढेर ब्याजमा
दुई चार किलो प्याज किनेँ आज बिहानमा ।
त्यो टमाटर बिर्सेर फेरि बजार धाउँदा
हैरानी खुब बेहोरेँ बुद्धि बिर्को लगाउँदा ।

हौस्याए घरमा मासु खानुपर्छ खसी भनी
लौ लौ भन्दै म स्कुटी चलाएँ र गएँ अनि ।
एक खसी यसो हेर्दा राम्रो लरक्कको थियो
समाएँ म यहीँ लान्छु के कति पर्छ भन्नु हो ।

साठी हजार छाडेन पैसा कम्ती भयो जहाँ
भो लैजान्न भनी भन्दा हप्की दप्की भयो त्यहाँ ।
अघि बेची म सक्ने थेँ मेरा गाहक भड्किए
लैजानै पर्छ लैजाऊ भन्दै साहु ती कड्किए ।

दुई चार जनालाई फोन गर्दा उठेन खै
रामकृष्णे उता भेटेँ सापटी नै दिएन खै
त्यसैले यो खसी ल्याएँ मोटर्‌बाइक त्यो दिएँ
घिसार्दै यो खसी ल्याएँ त्यसैले रातिमा पुगेँ ।

०००
भरतपुर ५, चितवन

इलस्ट्रेसन : अनुप गुरूङ