नेपाली हास्यव्यङ्ग्य अनलाइन पत्रिका

कलानिधि दाहाल :

उन्माद मादको आँखो रातो दशैँ छ ओर्लियो
संयमका सबै स्नायु झञ्झा हुन् अब कुर्लियो !
खुराफाती हुने हुन्छन् अग्ला शिखरका चुली
भट्टीप्यार सजाएर हिँडेका छन् डुली डुली !!

बिचरा भोकका पेट निन्याउरा सबै यता
नाङ्गा आङ सधैँ उस्तै दशा दशैँ जतातता !
चुहिएका सबै छाना ऋणले भ्वाँङ पर्दछन्
अझ चाङ थपी मेरा आर्त आवाज झर्दछन् !!

मुसा पण्डित छेड्दै छन् भकारी भयका यता
नभएका गरी दुर्गा पूजा ठग्छन् जतातता !
परम्परा छ यो अन्ध बिराला बाँधिने विधि
देखी यो जङ्गली राज छक्क पर्छ कलानिधि !!

आफूजस्तै गरी अर्को हिंसाका रक्त छिर्छिर
शठमूर्ख यता मख्ख पर्दै घुम्दछ फिर्फिर !
बिर्सी मानवता अग्लो असुर ज्यादती विधि
बडादशैँ अरे यस्तो छक्क पर्छ कलानिधि !!

पेट खाली भरी देख्छु ललाटभर चामल
ऐले लिए भरे छैन भाँडो खाली छ सामल !
बाहिरी स्वाङ छाडेर संयमका लिए विधि
कति गद्गदमा हुन्थ्यो विरोधको कलानिधि ??

लुछिए मुटु नै चोक्टा लुछ्दा ठान्ने भए मन
अन्धविश्वास मिल्काई चेतनामा झुले जन !
उठ्ने मानवता अग्ला हिमालझैँ भए विधि
उल्लास मनमा भर्दै खुशी हुन्थ्यो कलानिधि !!

जुवातास हुनेसाथ हिंसा हल्केर हल्हल
आँखा राता बनाएर गर्छ जो नित्य खल्बल !
स्याल, ब्वाँसा अझै गिध्दजस्ताको हुन्छ यो विधि
विधान विधि यी जस्ता पाना च्यात्छ कलानिधि !!

गाडीमा भीड लागेर अल्पायु आयुमा हुने
विमानमा हवा हुर्की खोँचमा लास थुप्रिने !
अन्धविश्वासका हल्ला चल्ला हुन् यी दशैँ विधि
भेडोझैँ लाम लागेर हुत्तिँदैन कलानिधि !!

धर्मधारकको भेद मान्छे मान्छे फुटाउने
अखण्डमा गरी खण्ड मान्छेलाई टुटाउने !
वर्षाका भेल हुन् चाड दशैँ नायक हो विधि
अमानवी सबै चाड आड लिन्न कलानिधि !!
०००