नेपाली हास्यव्यङ्ग्य अनलाइन पत्रिका

मीनप्रसाद लामिछाने :

शुभकामना आम नेपालीहरूमा
आसन्न बडा दसैँ, तिहार र छठको
विदेसिएका छोराहरू आफ्नै खुट्टाले हिँडेर घर आउन् र,
आउँदा श्रीमतीलाई साडी,
छोरीलाई मोबाइल र छोरालाई ल्यापटप मात्र हैन
वृद्ध बाआमालाई एक पाकेट मिठाई पनि ल्याउन् ।

केवल चाडपर्व मनाउनकै लागि
चर्को व्याजदरमा कर्जा काढ्ने र
छिमेकीलाई देखाइछाड्ने बुद्धि नलागोस्
भुँडीमा ठिक्क जाओस् बढी भएर
तलमाथि दुवैतिरबाट एकसाथ नआओस् ।

आधुनिकताको नाउँमा, सन्तानले
नयाँ पाईन्ट नकाटुन् स्कुल जान्छु भन्दै
डेटिङ् गएर नढाँटून्
जुवाको खालबाट समातेर पुलिसले नलगोस्
साथीले सम्साँझै भट्टीमा जाउँ पनि नभनोस्
बरु चाडपर्व भरि घरै भट्टी बनोस्
टीकाको दिन आफन्तकहाँ सूतक परोस्
त्यति नभए कसैले नेपाल बन्द गरोस्
जे भए पनि टीकाको टन्टा र,
लावालस्कर बोकेर नाता सोझ्याउँदै
घरघर जानुपर्ने लन्ठाबाट मुक्ति मिलोस् ।

अन्त्यमा पुनः एकपटक,
शुभकामना आम नेपालीहरूमा आसन्न
बडा दसैँ, तिहार र छठको आउनुस् !
जमघट गराउनोस् भोज लगाउनोस्,
मोज गर्नोस् तर एघार महिना गोरु झै
जोतिएर जम्मा गरेको पैसा
एक महिनामा नसक्नोस्,
पख्नोस् चाड जान्छ, काल आउँदैन
त्यसैले पछिका लागि पनि साँच्नुपर्छ
किनकि तपाईं अर्को चाडका लागि पनि त बाँच्नुपर्छ !

०००
मैले जिउन जानिनँ ।