नेपाली हास्यव्यङ्ग्य अनलाइन पत्रिका

तारा गाउँले :

फेरि
अन्धकार खसेको छ धर्तीमा

आज यता
सुनसानको स्तब्धता माझ
कुकुरहरू भूकिरहेछन्
लाटोकोसेरो कराइरहेको छ ।

बत्ती गुम भएको यो रातमा
सिंहदरबारबाट
आजै गृहमन्त्री हराएको खबर आयो
सुनिँदैछ
अपराधीले पुलिसलाई
गृहमन्त्री खोज्न आदेश जारी गर्‍यो ।

मन्त्रीजस्तै लाग्छ अपराधी
वा
अपराधीजस्तै लाग्छ मन्त्री ?
छुट्याउन गाह्रो छ ।

विपक्षी दलको नेता भन्दैछ
अपराधीहरू नछुटुन्
खबरदार !
मलाई सिधा आँखाले नहेर
मेरो अनुहार अपराधीसँग मिलेको मात्र हो
भर्खरै पशुपतिनाथमा
सुनको जलहारी चढाएर आएको
म कसरी अपराधी हुन सक्छु ।

अपराधीहरू अपराधी समाउन
संसदमा हंगामा गरिरहेका छन् ।

खासखुस खासखुसभित्र
चकमन्न छ गाउँ शहर
बत्ती गुम भएको यो रात ।

०००
इलाम, हाल : दुवाकोट, भक्तपुर