नेपाली हास्यव्यङ्ग्य अनलाइन पत्रिका

वासुदेव पाण्डेय :

जान्नेसुन्ने पठित अगुवा मौन सत्तापरस्त
नालेबेली नियम विधि नै देखियो रोगग्रस्त ।
आँखा छल्दै दल र बलले भर्न लागे भकारी
कुर्सी, सत्ता, पद,सडकमा देखिए धुन्धुकारी ॥

पाए पैसा नियम नमिलोस् लाइने शीघ्र तोक
हाम्रा राम्रा अवगुण सबै गर्दछन् ढाकछोप ।
सोझासाझा गरिबजनको लागि बन्दै छ पासो
आफैँ पापी पतित पदमा पोख्नु खै के गुनासो ॥

मानूँ आफू अधिपति तथा ठान्छ सर्वज्ञजस्तो
पैसा पाए पद पनि मिले देश चाहिन्न जस्तो ।
मेरो आफ्नो मुलुक जननी यो कुरा नै नजानी
आगो लाई घरभरि ढुकीको बटुल्ला खरानी ॥

उल्टो नक्सा यस मुलुकको कोर्न खोज्ने पदस्थ
पार्टीभन्दा अलग छ र को राष्ट्रवादी, तटस्थ ।
सत्ताधारी दल र दलका कार्यकर्ता विशिष्ट
कोही छैनन् प्रतिनिधि यहाँ पूर्ण कर्तव्यनिष्ठ ॥

सीमा मिच्दै विधि नियमका देश आफ्नो बिगारी
आफ्नो सानो घर परिधि पो राख्न थाले सिँगारी ।
गोड्ने भन्दै मुलुक बिरुवा जो जरा काट्न थाले
हेर्दा हेर्दा पदसित तिनै देश यो साट्न थाले ॥

०००
सुर्खेत