नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

ऊ बाटोको छेउमा मकै पोलेर
घर चलाउँछ
छोरा छोरीहरुको स्यहार गर्छ !
तर हरेक दिन
नगरपालिका प्रहरीहरूको कुटाई खान्छ,
घाइते हुन्छ !
भन्नुस् सरकार !
तिम्रो मर्यादा लिस्टमा
ऊ कति नम्बरमा पर्छ ?

ऊ खेतमा हलो जोतेर,
जीवन निर्वाह गर्छ,
तिम्रो घरको भकारी भर्छ !
तर हरेक दिन जसो मालिकको हप्की खान्छ !
सधैँ अभावमा बाँच्छ !
भन !
तिम्रो मर्यदा लिस्टमा,
ऊ कति नम्बरमा पर्छ !

ऊ सिमाना नजिक बस्छ,
सिमानाको पहरेदारी गर्छ,
पटक पटक भरतीय रिजर्व पुलिसको
डण्डा र ककट्टीको मार खेप्छ !
भन !
तिम्रो मर्यादा लिस्टमा
ऊ कति नम्बरमा पर्छ ?

ऊ हिजोको तिम्रो योद्धा,
तिम्रो सत्ता उक्लने गतिलो भर्‍याङ,
तर आज सडकमा मागेर खान्छ
हरेक दिन तिम्रो पुलिसको डण्डा खान्छ
भन !
तिम्रो मर्यादा लिस्टमा
ऊ कति नम्बरमा पर्छ !

भन !
तिम्रो मर्यादा लिस्टमा
ठग व्यापारीहरु कहाँ पर्छन् ?
भ्रष्ट हाकिमहरु कहाँ पर्छन् ?
तस्करहरुसँग नाभि जोडिएका
नेता र तिनका सन्तानहरु कहाँ पर्छन् ?

तिम्रो मर्यादा लिस्टमा
शहिदका आमा, बा पर्छन् कि पर्दैनन् ?
देशको गीत गाउने गायक र कविहरु पर्छन् कि, पर्दैनन् ?
सिमानामा अतिक्रमणकारीसँग भिँड्ने
तिलाठीका देवनारायणहरु अट्छन् कि अट्दैनन् ?

०००
गोरखा