नेपाली हास्यव्यङ्ग्य अनलाइन पत्रिका

भोजराज रेग्मी मुखाले :

मनसुनको ट्रयाक लाएर
परेड खेलिरहेछ- झरी
बाढीपहिरोको शोकगाथा गाएर
चित्रगुप्तको खातामा
हिसाव लेखाइरहेछ्न्
बेसहाराहरू ।

लोकतन्त्रको फ्याङ्लो लगौँटी लगाएका बाँदरहरू
मदारीले चलाएको रिमोटको इशारामा
देखाइरहेछ्न् – भद्दा नाच ।

इमान्दार भनिएका बाउसेहरूलाई लखेटेर
जिम्दार मुखियाका हली खेतालाहरू
अग्रगमनको झिल्के जामा लाएर
आलीमा उभिएर लाउँदैछ्न् नारा ।

वर्षौँदेखि उचित उपचार र स्याहार नपाएर
दीर्घरोगले थला परेकी अभागिनी आमा
कपुतहरूको कर्कश संवाद र कोलाहलले झर्को लागेर
विचरी !!!
डाँको छोडेर रुन खोज्दा पनि सकेकी छैनन् ।

सोझा निमुखाको धनमाथिको रातीगेडी
एकसुर्को घरबारी पनि हड्पिन
मौका कुरेर राल काढ्दै बसेका झट्केलाहरू
जाली मुचुल्का उठाएर
कीर्ते तमसुक लेखाइ सहीछाप धस्काइरहेछ्न् ।

०००
पेप्सीकोला, भक्तपुर