नेपाली हास्यव्यङ्ग्य अनलाइन पत्रिका

डा. शंकर चिमाैरिया :

आशाहरू मार्न सकेकोमा
निराशाहरू छर्न सकेकोमा
खुशीहरू खोस्न सकेकोमा
पिडाहरू दिन सकेकोमा
तिमीलाई बधाई ।

गुटबन्दी गर्न सकेकोमा
गुलामहरू भर्न सकेकोमा
स्वेच्छाचारी बन्न सकेकोमा
जथाभावी गर्न सकेकोमा
तिमीलाई बधाई ।

नेताहरू रिझाउन सकेकोमा
राजनीति भित्र्र्‍याउन सकेकोमा
सेता हात्तीहरू पाल्न सकेकोमा
योग्यहरू फाल्न सकेकोमा
तिमीलाई बधाई ।

निर्भीकतालाई पेल्न सकेकोमा
सङ्घभित्र खेल्न सकेकोमा
स्वाभिमान किच्न सकेकोमा
आत्मसम्मान थिच्न सकेकोमा
तिमीलाई बधाई ।

जथाभाबी डुल्न सकेकोमा
मनलागी बोल्न सकेकोमा
जालझेल गर्न सकेकोमा
मालामाल हुन सकेकोमा
तिमीलाई बधाईं ।

गुणस्तर झार्न सकेकोमा
विकृतिसँग हार्न सकेकोमा
पलायन गराउन सकेकोमा
संस्थालाई डुबाउन सकेकोमा
हदैसम्म गिर्न सकेकोमा
तिमीलाई बधाई ।

०००
भकुण्डेबेसी, काभ्रे ।