नेपाली हास्यव्यङ्ग्य अनलाइन पत्रिका

प्रेम ओली ढकलपुरे :

अहा ! कस्तो अनौठो भेला
फट्याङ्ग्राहरू मेला
यता फट्ट जान्छ
उता फट्ट जान्छ
क्या मिलाएर
जनताको पसिना खान्छ
कस्तो कस्तो खेला
आहा ! हेर फट्याङ्ग्राहरूको मेला ।

स्वदेश पनि घुम्छ विदेश पनि जान्छ
विदेश जाँदा झन् हुल बोकेर जान्छ
यता रहँदा रुपैँया खान्छ
उता जाँदा डलर खान्छ
जे खाए पनि यसको के जान्छ ?
जस्तो छ गुरु उस्तै छ चेला
आहा ! कस्तो अनौठो फट्याङ्ग्राहरूको मेला ।

रुक्दैन यो कहिलै खाइरहन्छ
नाम बदल्छ रुप बदल्छ
झुक्काएर शक्तिमा आइरहन्छ
किसानलाई सक्यो श्रमिकलाई सक्यो
गाउँ सक्यो देश सक्यो
खै कसले यसलाई चाहिरहन्छ ?
बोल्छ अनेक बेला कुबेला
आहा ! कस्तो अनौठो !! फट्याङ्ग्राको मेला ।

जताततै फट्याङग्राको झुण्ड
झुण्डहरूमा छ मुन्डै मुन्ड
गाउँबाट उठ सहरबाट उठ
यो फट्याङग्रालाई धान झैँ चुट
अब आयो सबले लौ सोच्ने बेला
रहनु हुँदैन यो फट्याङ्ग्राको मेला ।

०००

घट्टेकुलाे, काठमाडाैं