नेपाली हास्यव्यङ्ग्य अनलाइन पत्रिका

खगेन्द्र नेउपाने :

म भारवी होइन,
अर्थ गौरव प्रस्तुत गर्ने
म यज्ञबल्क्य होइन,
हुतुतु वेद बमिट गर्ने
(तित्राहरु पलकाउँने)
न म राजा नल हुँ
कलीको बसमा पर्ने
गालव, कन्व, साण्डिल्य र कपिल
कोहि पनि होइन म
म त केवल गोठालो हुँ गोठालो
राजकुमार प्रभाकरको कथा भन्ने
जादुको छडीको कथा सुन्ने ।

मलाई बानी परेको छ
साधूले ल्याएको फल खाएको भोलिपल्ट
रानी गर्भवती हुन्छे
राजकुमार जन्मन्छ
हुर्किहाल्छ
साधूले लान्छ
उस्को बलिकृयाबाट भाग्छ
निर्जन शहरमा पुग्छ
राजकुमारी भेट्छ
जादुको छडीले ब्युँताउँछ
जादुको छडीले सुताउँछ
आदि आदि
म यहि कथामा बानी परेको मान्छे
गोठालो हुँ गोठालो ।

कतिपय रासायनिक प्रतिकृयाहरु
क्यटालिष्टको अभावमा सम्पन्न हुन्न क्यारे
आफ्नै अहमभित्र खुम्चिरह्यो भने
ताराहरु जस्तै पड्किनु पर्छ रे
तर म
यी यथार्थ भन्दा टाढा
जङ्गली बाँदर हर्काइरहेको
लाल्मुलाई र तारीलाई थर्काइरहेको
गोठालो हुँ गोठालो ।

०००
गाैरादह, झापा