नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

झगडा तगडा बन्दै, तप्कातप्का विवाद छ
चुच्चे ढुङ्गो उहीँ टुङ्गो बुङ्गा हो अभिशाप छ
कार्यदल बनाएर के गर्‍यौ बोल खोलमा
बालुवा गिट्टी पेलेर तेल झर्दैन कोलमा ॥१॥

सालौँ-साल चले जाँच परिणाम सुनिन्न खै ?
नाता चाकरका हत्कडी, बाँधियो कतै ??
प्रभुभक्ति सधैँ गर्दा दास शक्ति बलाबल –
पुगेरै जनता देश, धस्सिँदैछ रसातल ॥२॥

ल्याङफ्याङ गरी हाँसे टाउका- टाउके सिधै ।
कुर्चीकै फुर्तिमा नाचे खन्चुवा लाउके दुवै ॥
कार्यान्वयनको, ‘वाचा’ आचा गन्दकी मात्र भो ।
हातमा शून्य थामेर भरिलो गात्र मात्र पो ॥३॥

शीर्षका चुचुराभित्र दूरदृष्टि सफा प्रण –
फलेनन् किन देखिन्छ छातीभरि व्रणै व्रण ?
अध्यारो व्योम बर्सेर, उल्का उत्पात हुन्छ कि ?
अकर्मण्य लुला दास, धराले श्राप दिन्छ कि ? ॥४॥

०००
धादिङ