नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

शक्तिको जय होस् !

शक्तिको भक्तिमा
चलायमान !
उहाँ दाल, भातको सट्टा,
सुनको डल्ला खानु हुन्छ !
तरकारी र भुटनको सट्टा,
कमिसन खानु हुन्छ !
सरकारी जग्गा जमिनलाई,
दूध जसरी घुट्क्याउनु हुन्छ !

शक्तिकै कारण,
उहाँ फलाम र सिमेन्टीका पुलहरू,
सजिलै चपाउनु हुन्छ !
एरपोर्टका जहाजहरू सुलुक्क निल्नु हुन्छ !
सडकका ढुंगा र गिटीको त कुरै छोडौँ,
अलकत्रा पनि,
पानी जस्तै घुट्क्याउनु हुन्छ !

शक्तिको भक्त भए रै होला,
दाल, भातले उहाँको भोक मेटिदैन ,
सागपात र दूधले उहाँलाई स्वाद दिँदैन !
त्यसैले पेट भर्नकै लागि होला,
सिंचाईका ठूला ठूला नहर खानु हुन्छ
बिजुलीका पावरहाउस, अग्ला टावर र
वनजंगल आँखा चिम्लेर निल्नु हुन्छ !

शक्ति गजबको कुरा,
त्यै शक्तिको आडमा,
उहाँ नीति नियम च्यात्नु हुन्छ !
बिरोधीहरुको,
टाउकोमा डण्डा बजार्नु हुन्छ !

आउ,अब हामी पनि
यस्तो महाशक्तिको
महिमा गीत गाउँ !
शक्तिशाली प्रभुको,
आशिर्वाद ग्रहण गरौँ !
शक्तिको भक्ति गरौँ !
एकबारको जुनी सपारौँ !

०००
गाेरखा