नेपाली हास्यव्यङ्ग्य अनलाइन पत्रिका

जीवनाथ अधिकारी :

देखियो कि भनी लाज मानेर फुत्त खोल्दछ
सर्वाङ्ग ढाकिएको छ भन्ने तथ्याङ्क बोल्दछ ।
लँगौटी काँधमा फन्को मार्छ पृथ्वी घुमेसरि
हो नेता, मञ्चमा नाच्छ भाँची कम्मर बेसरी ॥१॥

साँच्तछ सपना उस्तै संसार सब झल्किने
उच्च हिमालको तृष्णा आँखाबाट छचल्किने ।
नातावाद सबै त्यागी, छन् आफन्त घरैभरि
हो नेता, मञ्चमा नाच्छ भाँची कम्मर बेसरी ॥२॥

कालो बादलको झल्को भावमा द्वेष छिप्त छ
नयाँ जाल घुमाएर कला-सौन्दर्य खिप्त छ ।
न्यानो बाफ कुराभित्र मुस्लिन्छ त्यो सधैँभरि
हो नेता, मञ्चमा नाच्छ भाँची कम्मर बेसरी ॥३॥

चुनावी खेलमा झेल हुन्छ कैले कताकति
अर्कैको दोष बल्झिन्छ आफू सुग्घर जेजति ।
दुधमा स्नान गर्दै ऊ मिठो मुख गरी गरी
हो नेता, मञ्चमा नाच्छ भाँची कम्मर बेसरी ॥४॥

पदका मदमा मस्त द्वेध भाषा उकेल्दछ
तालुमा कसरी त्यस्तो आलु निर्भय फल्दछ ।
औँला उठ्छ उठोस्, छुन्न ठाँगेले झन् कसै गरी
हो नेता, मञ्चमा नाच्छ भाँची कम्मर बेसरी ॥५॥

आचार शिष्टताभित्र अनुशासित बन्दछ
छओटै यन्त्रमा लिप्त आफूलाई सँगाल्दछ ।
कथाभित्र नयाँ नौला भर्छ गाथा थरी थरी
हो नेता, मञ्चमा नाच्छ भाँची कम्मर बेसरी ॥६॥

०००
भक्तपुर