नेपाली हास्यव्यङ्ग्य अनलाइन पत्रिका

जगदीश्वर पाेखरेल :

सदा दुष्ट आँखा चिहाएर बस्छौँ
गरी जालसाची छुरा मात्र धस्छौँ
कठै भोकभोकै हजारौँ सुदामा
परेछौँ उँचो भ्रष्टको तालिकामा ।।१

बहाना बनायौँ गरेनौँ विकास
समस्या छँदै छन् गरेनौँ निकास
सधैँ हाड घोट्ने रुँदै छन् कुनामा
परेछौँ उँचो भ्रष्टको तालिकामा ।।२

उठे माथि उठ्छौँ सधैँ अर्थतन्त्र
पुरानाहरू छौँ नयाँ छैन मन्त्र
बरा देश उठ्नै परेको छ धामा
परेछौँ उँचो भ्रष्टको तालिकामा ।।३

विनास्वार्थ कैल्यै कुनै काम छुन्नौँ
कुरा मात्र चर्का हुनै काम दिन्नौँ
बडो कष्ट भोग्नै पऱ्यो जिन्दगीमा
परेछौँ उँचो भ्रष्टको तालिमा ।।४

खुराफात गर्दै थप्यौँ नव्य पाना
बनी भ्रष्ट सेवी किन्यौँ स्वर्ण छाना
कसै सुध्रिएनौँ बन्यौँ भ्रष्ट आमा
परेछौँ उँचो भ्रष्टको तालिकामा ।।५

०००
पाउँदी, लमजुङ हाल – काठमाडाैं