नेपाली हास्यव्यङ्ग्य अनलाइन पत्रिका

राजाराम बर्तौला :

एउटा आउँछ टपरटुँइयाँ फाँईफूई लगाउँछ
मै हुँ मुलुकको तारणहार भन्दै माला जपाउँछ
झोली तुम्बा उसकै ठुलो चिम्टा डन्डा भिरेको
जुन जोगी आए पनि कानै चिरेको ।

अनुहार हेर्दा माया लाग्दो बोली झनै मिठो
गरिखान देन भन्दै विरोधीको गर्छ उछित्तो
होला भनी विश्वास गरी मत दिएको
जुनै जोगी आए पनि कानै चिरेको ।

एउटा हो झालेमाले अर्को निकै बाठो
यी सबैको नजरमा हामी जनता लाटो
कसको भर गर्नु बरै यी खुराफातीहरूको
जुनै जोगी आए पनि कानै चिरेको ।

जनतालाई झुक्याउन कति जानेका
जालीझेली धुन्धुकारी सबले मानेका
नेता भन्ने अगुवालाई फूलमालाले थिचेको
जुनै जोगी आए पनि कानै चिरेको ।

जनताको पेटमा सारङ्गीको तार रेटेर
घ्याम्पो जस्तो उसकै भुँडी ढुकुटिले सेकेर
भोकै मरून् जनता केलाई चासो गरेको
जुनै जोगी आए पनि कानै चिरेको ।

०००
काठमाडौं
भ्रमित सत्य (२०८०)