नेपाली हास्यव्यङ्ग्य अनलाइन पत्रिका

राजाराम बर्तौला :

युद्ध सर्वकालिक हो
महाभारत हिजो जस्तै आजपनि उस्तै छ
युद्ध जारी छ ।
दुशासन हिजो जस्तै आज पनि
चीरहरण गर्दैछ द्रौपदीको
द्रौपदीहरूको विवशता
हिजो जस्तो थियो आज पनि उस्तै छ
फरक छ त केवल
हिजो केशव थिए
द्रौपदीको लाज बचाउने
आज केशव छैनन्
कुनै अबलाको अस्मिता बचाउने ।
अब आफ्नै चेतनाले
शक्ति र सामर्थ्यले
द्रौपदीहरू स्वयम्ले
आफ्नो अस्मिता आफैं बचाउनु पर्दछ ।
हिजो जस्तै आज पनि
महाभारत चलिरहेछ
शकुनिहरू आफ्नो कुटिले दाउको
पासा फ्याँक्न उद्यत छ
शकुनिहरू हिजो जस्ता थिए
आज पनि उस्तै छन्
महाभारतको युद्ध
हिजो जस्तो थियो आजपनि उस्तै छ
युद्ध जारी छ ।

०००
हेटौंडा, हाल भक्तपुर