नशा
प्राण त्याग्न सक्छ जो फसेर युध्द शैलमा गर्छ यत्न प्राप्तिमा हजार सौम्य मूर्तमा भर्छ पेट खै कहाँ बजार डुल्छ प्रातमा यो नशा खराब हो बिगार्न सक्छ लातमा।
टंकराज ढकाल तितेपाती :
यो नशा अधीर जो भयो अटेर तालमा
जिन्दगी गुजार्नमा कतै बहन्छ जालमा
बस्छ जो दिमागमा लुकी रहन्छ यादमा
दुष्ट जो समाजमा डसी समस्त कालमा।१
डुल्छ यो नशानशा पसेर आसपासमा
भुल्छ जो कताकता प्रहार गर्छ मर्ममा
हुन्छ यो यदाकदा समाज भाँड्छ मातमा
भै गुलाब कष्टको सहर्ष कालपाशमामा।२
लाग्छ रन्न माथमा डुलेर हातहातमा
दिन्छ धेर यातना जघन्य मातरातमा
हुन्छ चुस्त योजना छ दीर्घ चाल घातमा
लुब्ध हुन्छ याचना सुमार्ग त्याग्छ कर्ममा।३
बिम्वमा रटान यो प्रदिप्त हुन्छ खानमा
भावमा अभावको स्वभाव बोक्छ जोशमा
जोडको प्रभावले सुवर्ण ताक्छ ओजमा
जाग्छ जो कुभावले अभिन्न लाग्छ शर्तमा।४
प्राण त्याग्न सक्छ जो फसेर युध्द शैलमा
गर्छ यत्न प्राप्तिमा हजार सौम्य मूर्तमा
भर्छ पेट खै कहाँ बजार डुल्छ प्रातमा
यो नशा खराब हो बिगार्न सक्छ लातमा।५
नीच राख्छ भावना अटेर खानपानमा
नित्य भाग्छ जो घना अजङ्ग मोहजालमा
भव्य मान्छ जो अझै लुकेर खोंचखोंचमा
दिव्य लाग्छ के उतै प्रसङ्ग जुर्छ धाममा।६
०००
नवलपुर