नेपाली हास्यव्यङ्ग्य अनलाइन पत्रिका

घनश्याम रेग्मी :

लोभका जाल फालेर अल्झायौ अफवाहमा
नेपाली जनता पार्छौ सधैँ नै गुमराहमा ।
केही होला थियो आशा त्यो त्यान्द्रो आज छिन्न छ
नेताका के कुरा गर्छौ देखिँदै चाल भिन्न छ ।

देशभक्ति बहाना हो चाहना धनको गर
जतिसक्दो कमाएर आआफ्नो स्वार्थ लौ भर
जाऊन् बाहिर चाहे जो हलुङ्गो उति नै हुने
सँगैका निस्किए साथी झोलुङ्गो हलुका हुने ।

ठेक्का पट्टा सिधै पार आफन्त दाइ भाइमा
राष्ट्र परे छ के खाँचो गहिरो गर्त खाइमा ।
तिमी बाहिर बस्दामा राष्ट्रवादी निकै बन
सत्तामा जहिले पुग्छौ कमाऊ बेस्सरी धन ।

नेतालाई सधैँ पुज्नू पुर्याएर खुसामद
नेताका चाकरी गर्नू पाइनेछ ठुलो पद ।
के खालान् नातिका पुस्ता आज जोहो नगर्दिए
कमाई कसरी होला आजैदेखि नसोचिए ।

भत्ताको जोखना हेर सत्ताको भर के छ र
व्यापारी आज नै भेट भोलिको भर के छ र ?
आफ्ना सन्तान सारा लौ पछाडि बस्न लौ भन
रातारात कमाएर कुम्ल्याऊ बेस्सरी धन ।

०००
हाल – बैजनाथ १- चिसापानी, बाँके