नेपाली हास्यव्यङ्ग्य अनलाइन पत्रिका

डा. खगेन्द्रप्रसाद दाहाल :

सतहका कुरा बुझ्दछन् भुरा
उपर बुन्दछन् जाल माकुरा
छ गहिराइमा भास दल्दल
जति गरूँ यहाँ हुन्छ अल्मल ॥

नयनमा धुलो छर्दछन् यहाँ
पछि घुसी घुसी फुक्दछन् धुवाँ
अभरमा पर्‍यो सुक्खको पल
जति गरूँ यहाँ हुन्छ अल्मल ॥

अझ बिहानमा धुम्म गुम्म छ
सतहमा खुसी भित्र धुम्म छ
उपर मेघले छेक्छ झल्मल
जति गरूँ यहाँ हुन्छ अल्मल ॥

हुचिल घुम्दछन् माथि फन्फनी
अति विरक्त छन् जिन्दगी मुनि
कति दुख्यो दुख्यो चित्त कोमल
जति गरूँ यहाँ हुन्छ अल्मल ॥

रथ सधैँ यहाँ हुन्छ ढल्पल
छ जहिल्यै यहाँ शान्ति खल्बल
नजर खोज्दछन् मात्र झल्मल
जति गरूँ यहाँ हुन्छ अल्मल ॥

०००
झापा