नेपाली हास्यव्यङ्ग्य अनलाइन पत्रिका

हृषीकेश बराल :

भयो साह्रै धोका सकल जनमा व्यर्थ अहिले
व्यथा पीडा खप्ने अब त कसरी रुष्ट भइयो ।
चिनारी साट्नाले महिषसित छन् लज्जित सब
विवेकभ्रष्टानां भवति विनिपातः शतमुखः ॥१

गलैँचा ओछ्याई बिच सडकमा नृत्य गरियो
घृणा हेलाँ गर्दा सकल घरको इज्जत गयो ।
बुझेनन् मर्यादा कदर नहुँदा लाग्छ शरम
विवेकभ्रष्टानां भवति विनिपातः शतमुखः॥२

घरैमा आएका अतिथि भनियोस् मान गरियोस्
कतै आफू जाँदा अनुभव छ के याद पनि होस् ।
अरूलाई हेप्ने नियत छ भने छाड्नु छ अब
विवेक भ्रष्टानां भवति विनिपातः शतमुखः ॥३

धनी होलान् कोही विकसित रहून् जे पनि हऊन्
डराई पुज्दैनन् शठ अरि कुनै मद्दत दिऊन् ।
महान् हुन्नन् कोही धन र बलले बुझ्नु छ सत
विवेकभ्रष्टानां भवति विनिपातः शतमुखः ॥४

कृपा मायाँ खोजी जिउन नपरोस् भिक्षुक बनी
पहेँलो खास्टाको वसन नरहोस् धार्मिक भनी ।
अरूले जे भन्छन् त्यस किसिमको मान्नु छ किन
विवेकभ्रष्टानां भवति विनिपातः शतमुखः ॥५

अरूले हेपेको सहन नसकी क्रोध भरियो
विचार्नू आइन्दा कदर गरियोस् ज्ञान दिइयो ।
भयो दाता भन्दै प्रभु शिव उही बन्छ र अब
विवेकभ्रष्टानां भवति विनिपातः शतमुखः ॥६

०००
पोखरा -२६ कास्की ।