नेपाली हास्यव्यङ्ग्य अनलाइन पत्रिका

दीनानाथ पोखरेल :

जो बुझ्ने राख्छ सामर्थ्य, त्यो सद्भाव बढाउँंछ ।
विकास गतिमा बाधा, भ्रष्टाचार पुर्‍याउँछ ॥०१॥

आत्मामा भ्रष्टता छोपी, अरूमा दोष पोख्दछ ।
भ्रष्टले भ्रष्ट नै रोज्छ, प्रजाका हक खोस्दछ ॥०२॥

भ्रष्टाचार बढे देश, नग्न कङ्गाल बन्दछ ।
विधिमा दाग रोपेर, ऊ ऐनमाथि चढ्दछ ॥०३॥

विधिका हीनको कर्म, सबैमा दुःख भर्दछ ।
देशको उन्नति गर्ने, चाहना नित्य मार्दछ ॥०४॥

भ्रष्टता शत्रु हो हाम्रो, छेक्छ नित्य समुन्नति ।
आँखा हो शान्ति सत्कर्म, हाम्रो उदय उन्नति ॥०५॥

अवैध कामको दाम, छाती नित्य जलाउँछ ।
सुखका स्रोत मासेर, सन्ताप हर्हराउँछ ॥०६॥

अर्काका धनको लोभ, गर्ने दुष्ट कहाउँछ ।
अर्काका मनको बोझ, हर्ने बुद्ध भनाउँछ ॥०७॥

अड्डाका काममा बाधा, अर्थले नै गराउँछ ।
झुटो सत्य भनी काम, अर्थले नै गराउँछ ॥०८॥

भ्रष्टले जातिको मान, शान अग्रजको थुनी ।
आफन्तसँगको नाता, तोड्छ त्यो दुष्टझैं बनी ॥०९॥

अर्थहीन हुने व्यक्ति, अड्डा धाओस् निरन्तर ।
त्यसका कर्मको पालो, आउँदैन कसै गर ॥१०॥

व्यक्तिका मान सम्मान, भ्रष्टले ध्वस्त गर्दछ ।
भावना शून्यभै आफू, नोटले पेट भर्दछ ॥११॥

हिजोका भ्रष्टतापूर्ण, सारा कर्म हटून् पर ।
सारा मानवको दर्द, हर्दै नित्य रमोस् जग ॥१२॥

आत्माको तम नासेमा, ज्ञान खुल्छ सरासर ।
सबैमा जम्छ उल्लास, ताप चिन्ता हटी पर ॥१३॥

दुष्ट दुर्गुणले युक्त, भ्रष्टाचार हटाउन ।
सबैको ध्येय एकै होस्, जन्मभूमी बचाउन ॥१४॥

०००
भक्तपुर