नेपाली हास्यव्यङ्ग्य अनलाइन पत्रिका

रामदेव पाण्डे :

मान्छे मान्छेबीच
वैमनस्यता खोपिँदै गरेको
कुन्नि कता कता
पत्थरमा प्राण रोपिँदै गरेको
थाहा पाएकी
एक दुखी पीडित आमा
रोगले मृत छोरा र
भोकले मृत छोरीको
आलो शव बोकेर
भौतारिँदै छिन् रे मन्दिर मन्दिर
मस्जिद र चर्चहरूमा
घोप्टिँदै छिन् रे
पण्डित पादरी र मौलानाका
पाउहरूमा
याचना गर्दै
ए पत्थरमा प्राण भर्ने
महामानवहरू हो
एउटा कृपा गरिदेऊ
भरखरै मृत मेरा यी
निर्दोष छोराछोरीका शवमा
पत्थरमा भर्ने प्राणबाट
अलिकति बचाएर
प्राण भरिदेऊ
ताकि यिनहरू फेरि
पहिले जस्तै खाउन्
हाँसुन् खेलुन् रोउन्
अर्थात
यी फेरि जीवित होउन् !

०००
काठमाडौं