नेपाली हास्यव्यङ्ग्य अनलाइन पत्रिका

डा. लोकेन्द्रप्रसाद पौड्याल :

राजनीतिमा पसेपछि
नशा लागेसरी
बाँचुन्जेलको कुर्सीमोह
ज्यानै फाल्ने गरी

निर्दल हुँदा पञ्चायतमा
कुराकानी ठिक्क
सत्ता ढल्दा रातारातै
बहुदल चिटिक्क

मौका छोप्दै कोल्टे फेर्ने
बिना आनाकानी
सदावहार सक्रियता
अवसर जानिजानी

छेपारो झैँ रङ्ग फेर्न
नहच्किने बानी
सिद्धान्तले जे नै भनोस्
पद मिलेमा खानी

कर्कलाको पानी जस्तो
नेताज्यूको चाल
अवसरवादी प्रवृत्तिको
यस्तै नै छ हाल ॥

०००
काठमाडौं