नेपाली हास्यव्यङ्ग्य अनलाइन पत्रिका

रामदेव पाण्डे :

एउटा सन्दर्भ
अकबर वीरबल कथाको
लाग्छ
आज पनि चलिरहेको छ
उतिवेला एक रात उनीहरूले
उस्तै उस्तै सपना देखेका थिए रे
एउटा
मानवमल कुण्डमा डुबेको
अर्को मधुकुण्डमा पौडेको
कुण्डबाट बाहिर निस्केर दुवै
एकले अर्कालाई चाट्दै थिए रे
आज पनि
उस्तै सपना देख्छन् सायद
राजनितिक नेतृत्वमा बस्नेहरू
र चाटिरहेको त देखिएकै हो
एकले अर्कोलाई
बर्कोले खास्टो र
खास्टोले बर्कोलाई
फेरिएर होला समय
सन्दर्भ पनि
अलिकति फेरिएको छ
त्यस बेलाको मधुकुण्ड पनि
मानवमलले भरिएको छ ।

०००
काठमाडौं