नेपाली हास्यव्यङ्ग्य अनलाइन पत्रिका

भोजराज रेग्मी ‘मुखाले’ :

१.
दुर्गमलाई सधैँ सताउने
राक्षस जस्तै भोक मार्न
शहरबाट हिँडेको चामल
हाकिम र ठेकेदारको एम्बुसमा परेछ
टाउको काटिएको मुर्कुट्टा ‘मल’
गाउँमा पुग्दा
भोकको जुलुसले थिचेर-मिचेर शहीद भएछ ।

२.
तिमीले पठाइदिएको रेमिटेन्सको
अरबी घोडा चढेर
इन्द्रेणी जोवनका उकाली ओरालीहरू नाप्दै गएँ
महत्वाकाङ्क्षाका डाँडाहरू नाघ्दै गएँ
तर, राक्षस जत्रै दुइटा भोकले
मलाई तर्साएर मार्न लागे प्रिय !
भान्सामा तर्साउने भोकलाई त
एटीएम कार्डले भगाउँदैछु
ओच्छ्याउनमा तर्साउने भोक भगाउन
क्यै गरी सकिनँ मैले !
त्यो हर्के हल्दार म छु नि भन्छ, के गरूँ !

०००
पेप्सीकोला, काठमाडाैं
‘चित्त दुखेको ओखती’ (२०७१)