नेपाली हास्यव्यङ्ग्य अनलाइन पत्रिका

कृष्णप्रसाद पौडेल :

कान्ला गरा बगरले, खुब याद दिन्छन् ।
पाखा कुना विपिनले, भरथेग माग्छन् ॥
रम्छन् विदेश मनुवा , पसिना बगाई ।
आयो वसन्त किन हो, बहुतै रमाई ?॥-१

गएर बाहिर युवा , युवती रमाए ।
हाम्रा विशाल सपना, विपना हराए ॥
रुन्छिन् धरा विरहले, पिरलो बढाई ।
आयो वसन्त किन हो, बहुतै रमाई ?॥-२

सत्ता र शासन भनी, मनुवा दगुर्छन् ।
मौका मिले दिनदिनै, सरकार फेर्छन् ॥
जाली र भ्रष्टहरूका, अति छन् कमाई ।
आयो वसन्त किन यो, बहुतै रमाई ?॥-३

सज्जा र मान पदले, नर ती ठुला छन् ।
चाहिन्न कर्म गतिलो, उपहार खोज्छन् ॥
नाच्छन् यहाँ दनुज ती, सुरताल पाई ।
आयो वसन्त किन हो, बहुतै रमाई ?॥-४

गर्छन् अनेक छल ती, सजिलै मिलाई ।
मासेर राज्य धनको, नहिँडून् गनाई ॥
नारा र भाषण दिए, मुखले कराई ।
आयो वसन्त किन हो, बहुतै रमाई ?॥-५

नाता कृपा मनुजका, गण छन् विभिन्न ।
सोझा र विज्ञजनका, किन मान हुन्न ?॥
खोक्छन् घमण्डपनले, पदभार पाई ।
आयो वसन्त किन हो, बहुतै रमाई ?॥-६

०००
बट्टार, नुवाकोट । हालः बालाजु, काठमाडौं ।