यो देश रक्षा गर
कैल्यै हुन्न सफा रहन्छ किन हो कालो सधैँ दालमा जे जे काम नहोस् भन्यो हृदयले त्यै हुन्छ नेपालमा एकातर्फ नदी छ किन्तु पुल त्यो हालिन्छ अर्कोतिर उल्टा छन् सब काम लौ न जनता यो देश रक्षा गर ।
रुद्र ज्ञवाली :
बौझा खेत र फाँट छन् गफ भने नौतालका चुट्दछौँ
ढोका बन्द भए उता यदि भने भोकै यता मर्दछौँ
चिन्ता छैन कुनै छ-छैन घरमा खाद्यान्न या रासन
जर्दा पिच्च थुकी चिया पसलमा ठोक्छौँ बडा भाषण ।
राख्छौँ चाह लगान पाँच छ भने नाफा मिलोस् द्वादश
खाई फोकटको भरौँ उदर यो कन्दै बसौँ ठस्ठस
बाँझो खन्न र बीज छर्न नपरोस् बाली फलून् त्यत्तिकै
अर्कै मानिसले उपार्जन गरोस् हिस्सा मिलोस् यत्तिकै ।
खोज्छौँ केवल खोट मात्र र सधैँ गछौँ रुखा टिप्पणी
भाँच्दैनौँ तर स्वार्थहीन मनले छेस्को र सिन्को पनि
आफ्नो नाम स्वयम् सिफारिस गरी आफै छ सम्मानित
देखी चाल अचम्मको छ अहिले लज्जा स्वयम् लज्जित ।
रक्सी बन्छ चुरोट बन्छ तर खै बन्दैन धागो सियो
चर्पी जाम भयो भने पनि यहाँ खोज्छौँ कुनै एन्.जि.ओ
सोध्दैनौँ छ कि काम गर्न जहिल्यै चाहिन्छ भन्छौँ हक
राख्छौँ माग मिलोस् सुशासन भनी गर्छाैँ लिलामी मत ।
कैल्यै हुन्न सफा रहन्छ किन हो कालो सधैँ दालमा
जे जे काम नहोस् भन्यो हृदयले त्यै हुन्छ नेपालमा
एकातर्फ नदी छ किन्तु पुल त्यो हालिन्छ अर्कोतिर
उल्टा छन् सब काम लौ न जनता यो देश रक्षा गर ।
०००
भैरहवा