नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

काला – तस्कर, धूर्त – चाप्लुस तथा, ठेक्दार नाफामुखी ।
लागू औषधि धातु भाँङधतुरो आयात गर्छन् कति ॥
हिंसा वृत्ति लिने र ठग्न कसिने, पापी महा-वञ्चक ।
कार्बाही गर राजकाज गतिलो भन्छन् सबै सञ्जय ॥

नातावाद कृपालु तस्कर धनी स्वार्थी छली चञ्चल
छोडी, सज्जन लोकका प्रियमुखी सत्पात्र छानून् दल ॥
जस्का भाव – विकास चाह – गतिला छन् स्वप्नदर्शी – सफा ।
हुन् राम्रा विजयी सफा मत खसी भू-स्वर्ग हुन्छिन् धरा ॥

धेरै भाषण भो नछाँट जनता, पट्यार मान्छन् अब ।
हाम्रामात्र नछान आग्रह गरी, राम्रा नछोड्नू कब ॥
यो मेरो गुट – क्षेत्र धर्म पथको, आस्था तथा पन्थको-
भन्दै, पक्ष लिँदा यहाँ मुलुकको समृद्धि झन् खस्कियो ॥

०००
धादिङ