नेपाली हास्यव्यङ्ग्य अनलाइन पत्रिका

दिनेश पाण्डेय :

जपी नित्य पैसो चटारिन्छ मान्छे
पटाएर माया लठारिन्छ मान्छे
दिएको भनेको नपुग्दा नपुज्दा
हकारिन्छ मान्छे मठारिन्छ मान्छे ।

स्वयम् मुर्मुराई बटारिन्छ मान्छे
स्वयम् जुर्मुराई मडारिन्छ मान्छे
हिँडे हात धोई कसैका विरुद्ध
कुचो लाइएझैँ बढारिन्छ मान्छे ।

अरूका कुराले उरालिन्छ मान्छे
अरूकै कुरामा बरालिन्छ मान्छे
पिरोलिन्छ पेलिन्छ हेलिन्छ मान्छे
जुगौँ यत्तिकैमै रङेलिन्छ मान्छे ।

कतै चाड वेला रयालिन्छ मान्छे
कतै पर्व मेला रङालिन्छ मान्छे
रुङी जिन्दगीको घडी फिट्फिटे यो
कसो के गरी पो सङालिन्छ मान्छे ।

रिले दौडमा झैँ हतारिन्छ मान्छे
बिरामी सधैँझैँ लतारिन्छ मान्छे
यसो गर्छु भन्दै उसो गर्छु भन्दै
थलाको थलामै थचारिन्छ मान्छे ॥

रयालिनु =हुँडलिनु

०००
०८१/०१/०१

काठमाडाैं