नेपाली हास्यव्यङ्ग्य अनलाइन पत्रिका

जीवनाथ अधिकारी :

तिमीले सके तिमी तान
मैले सके म तान्छु
जसले सक्छ उसले तानौँ
आऊ, हामी तानातान गराैँ !

तिमी हातपट्टि तान
म खुट्टापट्टि तान्छु
म हातपट्टि तान्छु
तिमी खुट्टापट्टि तान
आऊ, हामी तानातान गराैँ !

तिमी आधा अङ्ग च्यातेर लैजाऊ
म बाँकी अङ्ग च्यातेर लान्छु
तिमी एउटा सिङ भाँचेर लैजाऊ
म अर्को सिङ भाँचेर लान्छु
आऊ, हामी तानातान गराैँ !

तिमी मुटु चिरेर लैजाऊ
म कलेजो चुँडेर लान्छु
तिमी फियो छियाछिया पार
म पित्त धुजाधुजा पार्छु
आऊ, हामी तानातान गराैँ !

तिमी खुट्टा बाँधेर तान
म घाँटी थिचेर तान्छु
तिमी बोली निःशब्द पारेर थिच
म ढुकढुकी बन्द गरेर थिच्छु
आऊ, हामी तानातान गराैँ !

तिमी आगतको मुन्टो निमोठ
म विगतका पाउ बटार्छु
तिमी मेरा घरमा मट्टीतेल छर्क
म तिम्रा घरमा आगो लगाउँछु
आऊ, हामी तानातान गराैँ !

तिमी समुद्रलाई पुर्न थाल
म हिमालको शिखर भत्काउँछु
तिमी पुलका लठ्ठाहरू काट
म नहरका बाँध भत्काउँछु
आऊ, हामी तानातान गराैँ !

तिमी सत्यलाई झुठो बनाऊ
म झुटोलाई सत्य बनाउँछु
तिमी कालोलाई सेतो भन
म सेतोलाई कालो भन्छु
आऊ, हामी तानातान गराैँ !

तिमी पन्ध्रदिन बन्द गर
म पन्ध्रदिन बन्द गर्छु
तिमी भोकाहरूको पेट खोस
म नाङ्गाहरूको आङ खोस्छु
आऊ, हामी तानातान गराैँ !

तिमी मलाई अपशब्दले गाली गर
म तिमीलाई तिनै शब्द फिर्ता गर्छु
तिमी मेरा पिठमा छुरा हान
म तिम्रा छातीमा खुकुरी बर्साउँछु
आऊ, हामी तानातान गराैँ !

तिमी मलाई घृणा गर
म तिमीलाई पीडा दिन्छु
तिमी मसित द्वेष उमार
म तिमीलाई क्लेश थुपार्छु
आऊ, हामी तानातान गराैँ !

तिमी र म उत्तर-दक्षिणको फरक छौँ
त्यसैले हामी मारामार गरौँ
अप्रत्यक्षतः हाम्रो व्यवहार समान छ
त्यसैले मिलेर शेष सिध्याऊँ
आऊ, हामी तानातान गराैँ !

०००
भक्तपुर