नेपाली हास्यव्यङ्ग्य अनलाइन पत्रिका

सुशील रिजाल :

परिवार थियो तरबार भयो
घरबार विना दरबार भयो
अधिकार दियो अपकार भयो
भन के दुनियाँ वरदान भयो ?

किन पाप बढ्यो जब लालच भो
जब मानिस दानवमा गनियो
किन आँसु बहेन कि स्वार्थ बह्यो
बरु मानवता कि विचार कुह्यो ?

धन औषध होइन खाद्य कुनै
डसना धन होइन वस्त्र सुनै
धन डाक्टर होइन हो तर यो
विष यो विषयी धन आज भयो ?

कति सङ्ग्रह गर्छु भनेर मरे
धन साथ लिई कति सिन्धु तरे ?
कति नाम भए बदनाम भए
धन खोज्न गए कति लास भए ।

किन कर्ण भयो बलि नाम रह्यो
किन बाँच्छ दधीचि मरेर गयो ?
धनवान् गनिएर कुवेर गए
धनमै युवराज धिराज गए ।

धन यो सुख होइन हो कि भनूँ
धनहीन हुँदा कि दरिद्र भनूँ ?
सकिँदैन गनेर सकिन्छ धनी
बरु शाश्वत हो धनहीन धनी ।

०००
कीर्तिपुर, काठमाडौं