नेपाली हास्यव्यङ्ग्य अनलाइन पत्रिका

सुशील रिजाल :

साँचाे न्याय भयाे भनेछ पहिले सत्ता उता पल्टिँदा
घाती चाल गर्याै कि भन्छ अहिले सत्ता यता काेल्टिँदा ।
सत्ता खेल न हाे बुझेन कि बुझ्याे गाेटी भयाे खेलकाे
च्याँखे थाप्छ लुते बडो सकसले मार्ने उही झेल हाे ॥

सत्ता दाउ भनी उसै बखतमा लेखे कथा व्यासले
चाल्याे चाल यहाँ नयाँ रहले अन्याेल सन्त्रासले ।
हुन् आफ्नै हुन ता कि हुन् फरकका सत्ता समालोचक
सारा जिल्ल परे परे कहरमा सत्ता भयाे घाेचक ॥

सस्तो खेल भयाे यहाँ समयकाे भन्छन् महङ्गाे नर
हान्छन् मार यहाँ स्वयं अनुजले खाेज्छन् तिनै उत्तर ।
लङ्का शान्त थियाे भनेर सहजै ढुक्कै थियाे रावण
याे नाथे हनुमान हाे चकचके सक्ला र के नै छुन ॥

गर्दैनन् अनुमान वास्तव कतै सत्ता समाल्नेहरू
मेरै मात्र न हाे सब‌ै सिरिखुरी गर्छन् खुबै ढल्मली ।
यस्तै चाल भयाे नयाँ रहरमा साक्षी तिमी छाै सुन
सत्ता जाेकर भाे भनेर अहिले ढाँट्दै छ खाले किन ॥

के जित्याेै भन लाै खुलेर अहिले जित्नेहरू छाै कहाँ
मार्याै या त लुट्याै नढाँट नतिजा हार्नेहरू छाैँ यहाँ ?
खेल्याै घात सधैँ कथा धमिलियाे जित्ने झिनाे आसमा
चाल्याे चाल नयाँ स्वयं शकुनिले तान्याे नयाँ खालमा ॥

०००
२०८२/०६/२०