नेपाली हास्यव्यङ्ग्य अनलाइन पत्रिका

अनन्तकुमार बस्नेत :

पीडा खपेर जगमा सुविचार छर्ने
सञ्चेतको घट बिहान र साँझ भर्ने
हुन् जून घाम अथवा सब धर्मधाम
यी ज्येष्ठ नागरिकमा छ सदा प्रणाम ॥१

चैतन्यको नवदियो दिनरात बाल्ने
सन्मार्गमा पयर यी अविराम चाल्ने
हुन् कृष्ण वा भुवनका बलराम राम
यी ज्येष्ठ नागरिकमा छ सदा प्रणाम ॥२

सन्तानको हित निमित्त सगर्व खट्ने
रक्षार्थ यो जमिन दुस्मनसाथ लड्ने
हुन् ज्ञानका अति समुज्ज्वल दीप्त घाम
यी ज्येष्ठ नागरिकमा छ सदा प्रणाम ॥३

सम्पूर्ण जीवन दिएर समाजलाई
बस्ने सुधांशु जसरी नित मुस्कुराई
हुन् केन्द्रबिन्दु घरका किमती ललाम
यी ज्येष्ठ नागरिकमा छ सदा प्रणाम ॥४

यी वृद्ध हुन् अनुभवी जगका विशिष्ट
सम्मान्य पूज्य र प्रतिष्ठित लब्ध शिष्ट
बस्छन् कसी सदनमा सबको लगाम
यी ज्येष्ठ नागरिकमा छ सदा प्रणाम ॥५

०००