घनश्याम रेग्मीरुद्रकलि र खगेन्द्रलाई बिदाइ
मुर्दा शान्ति छ देशमा गजबको खाने र लुट्ने क्रम हाम्रा पुत्र कलत्र खेदिन पुगे बेचिन्छ हाम्रो श्रम यस्तोमा अब भूमिका अघि बढोस् तिम्रो छ त्यो योग्यता हाम्रा ती बलवाहु जो अनिकझैँ सम्बन्ध जोड्नु उता ।
घनश्याम रेग्मी :
जाऊ रुद्रकलि खगेन्द्र मरुमा हाम्रा युवा छन् जता
लाखौँ हन्डर खानु पर्दछ सधैँ बस्दा र बाँच्दा यता
यस्तो कष्ट सहेर बस्नु न निको सम्मान होला उता
कैयौंपल्ट मरेर बाँच्नु छ यहाँ भोग्दै सयौं दासता ।१
बेचिन्छन् दिनरात भूमि र नदी हाम्रा युवा स्वार्थमा
चेलीका करुणा कथा हृदयका कारुण्यता बाध्यता
यस्तो देश भयो कि पारि नगए चल्दैन मानो यता
भ्रष्टाचार बढेर ढाकिन गयो अग्लो सबै स्वच्छता ।२
मुर्दा शान्ति छ देशमा गजबको खाने र लुट्ने क्रम
हाम्रा पुत्र कलत्र खेदिन पुगे बेचिन्छ हाम्रो श्रम
यस्तोमा अब भूमिका अघि बढोस् तिम्रो छ त्यो योग्यता
हाम्रा ती बलवाहु जो अनिकझैँ सम्बन्ध जोड्नु उता ।३
जाऊ भन्न थिएन कत्ति मन यो सन्तानलाई उता
निर्धो राज्य भएर हो कि किन हो सारा युवा छन् उता
हाम्रो राष्ट्रिय स्वाभिमान बलियो हुन्थ्यो भने सन्तति
आफ्नै यो घर देशमा सब बसी गर्ने थिए उन्नति ।४
०००
हाल बैजनाथ १, चिसापानी, बाँके
Subscribe
Login
0 Comments
Oldest
