नेपाली हास्यव्यङ्ग्य अनलाइन पत्रिका

खोलाघरे साहिँलो :

कोही छन्, मूर्ति चोर्ने अतिशय धनले पूणर् नै छन् तथापि
तृष्णाले गाँजिएको मन अझ तिनको बन्छ लोभी र पापी
थुप्राका माथि थुप्रो जतिजति थपियोस्,थप्न नै खोज्छ फेरि
मर्दा के साथ जाला क्षणिक छ दुनियाँ यत्ति हेर्दै नहेरी ।

कोही छन् राज्य ठग्ने कल छल बलले शक्तिमा जम्न खोज्ने
खप्तै दुर्नाम भारी, अपयश र घृणा शासकै बन्न रोज्ने
कोही बन्छन् सुराकी गुपचुप रहँदै रच्दछन् ती वितण्डा
मिल्छन् पार्दै बहाना सहजसित मिले अंश वा भागबण्डा ।

हत्या गर्ने हजारौं जन अति निमुखा, भद्र निर्दोषलाई
ती हत्यारा सबै छन्, डटफट छ बडो शानमा छन् रमाई
सर्वेसर्वा हुने ता जति पनि कलुषी, भ्रष्ट वा तुच्छ नै छन्
यस्तैका तुच्छताले पतनतिर गई देश डुब्दो छ झन् झन् ।

बिक्छन् सामान्य मान्छे घरिघरि सहजै भोटका लागि बिक्छन्
बिक्छन् नेता र मन्त्री कमिशन र कुनै गूटका लागि बिक्छन्
बिक्छन् खोला र नाला, जमिन, जन, चुरे स्वार्थका लागि बिक्छन्
धेरै के भन्नुपर्ला छलसँग विधि वा न्याय औ नीति बिक्छन् ।

“मेरा चल्लाहरूको युगयुग खिचलो यो कतिञ्जेल चल्ला ?
चल्ला छन् चोर, चम्चे, चतुर-तर छुचा, चल्छ दुर्नाम, हल्ला
यी चल्लाले गरेको चिउचिउ पिरलो, कष्ट हट्नेछ केले ?”
भन्छिन् नेपाल आमा हरसमय यही बुझ्छ खोलाघरेले ! ।

०००
काठमाडौं