नेपाली हास्यव्यङ्ग्य अनलाइन पत्रिका

हृषीकेश बराल :

नारीलाई छलकपटले जो बलात्कार गर्ला
त्यस्तालाई सब जन मिली निश्चितै नास्नुपर्ला ।
हामी राखौं अभिमत यही फेरि गुथ्ला नि फेटा
खोजौं राम्रा असल मनका सत्य आदर्श नेता ॥१

गोही जस्तै उदर भरिँदा अश्रु धारा बगाई
फर्केलान् ती मनन गरियोस् खेद्न लाठो लगाई ।
सीधासाधा गरिप निमुखा खान सक्लान् नि गोता
फालौं यस्ता अधम मतिका खोज्न आदर्श नेता ॥२

श्रीलंकाकै पथतिर गयो भन्दछन् देश हाम्रो
रित्त्याएछन् मुलुक ढुकुटी लाग्छ सुन्दा नराम्रो ।
यस्तालाई अवसर दिँदा भोग्नु पर्नेछ गोता
खोजी ल्याऊँ धुइँधुइँ गरी जो छ आदर्श नेता ॥३

आमा काटी रगत पिउँदै देह टुक्रा बनाए
यस्ता नेता मुलुकभर छन् डुङ्ग कस्तो गनाए ।
पापीलाई अबिर घसियो साथमा लाल फेटा
फेरौं आयो समय अब ता खोज्न आदर्श नेता ॥४

खाली गोडा गत समयमा हिँड्दथे पान्थ जस्तै
गाडी घोडा सकल अहिले छन् कमाएर मस्तै ।
यस्तालाई परिचय दिने हुन्छ कालो छ फेटा
त्यागौं हामी शठ अगतिला खोज्न आदर्श नेता ॥५

०००
पोखरा -२६कास्की ।