नेपाली हास्यव्यङ्ग्य अनलाइन पत्रिका

हरिप्रसाद घिमिरे :

लङ्गुरे फैलियो आज गोरिल्ला मासिने भए
चिम्पान्जी छ बुढो यौटा युवाका दिन नै गए
ओराङ् ओटन छन् उस्तै गोरिल्लासित टाँसिदै
यो कालान्तरमा पक्का देशबाट छ भासिँदै ॥१ ॥

लङ्गुरे राज्य लिप्साले बढ्न सक्दैन भन्दछ्न्
चिम्पान्जी लङ्गुरे ढाढे दुवैको अति द्वन्द्व छ्न्
नीति छाडेर गोरिल्ला मासिँदै छ धरा भरि
एक्ले बाँदरको यौटा जत्था बन्यो सराबरी ॥२ ॥

संस्कारी देखियो एक्लै ढाडे बस्छ रुँदै बन
मासिने छैन चिम्पान्जी देश नै सुम्पिने मन
महाकाली दिने दादा गोरिल्लासित हिँड्दछन्
एम् सी सीका तिनै छोटे गोरिल्ला सब चिन्दछन् ॥३ ॥

एक्ले बाँदर जत्थामा यौटा देख्छु महासुर
छन् नागार्जुनमा साथी थर्कायो उसले पुर
कुनै बानरका छैनन् सिद्धान्तै बनमा बसी
चाहियो बाघको जत्था खान्थ्यो जङ्गलमा पसी ॥४ ॥

घडेरी बाँड्दछौँ भन्थे रोजगारी यतैतिर
झुट्टा भाषणले गर्दा पुगेको गिरिका शिर
गोरिल्ला हुलमा यौटा गद्धारी मारिने डर
वेश्याको छ मनोवृत्ति बदल्दै बस्छ त्यो घर ॥५ ॥

०००
गोरखा, हाल काठमाडौं