नेपाली हास्यव्यङ्ग्य अनलाइन पत्रिका

घनश्याम रेग्मी :

अनेकौं गरियोस् यत्न बाङ्गो हुन्छ सधैँभरि
लेखूँ कि टुकुरो काव्य बाङ्गो पुच्छरकै सरि ।
होला ज्ञानी उही व्यक्ति यो उखान बनाउने
देखिन्छ अहिले भाष्य चारैतर्फ सुहाउने ।

हाम्रा यी योजना उस्तै मानौँ कुकुर पुच्छर
हाम्रा पार्टी सधैँ दोग्ला लाग्दैछन् किन दुच्छर ।
सेवाग्राही पिरोलेर घुसपैठ सरासर
बाह्र वर्ष यसै राख के सोझो हुन्छ पुच्छर ।

नेताको छ उही बानी पद छोड्नै नचाहने
आफन्तमात्र छन् जम्मा बाहिरी हुन्न चाहिने ।
शिक्षा हेर लथालिङ्ग आउन्न किन ऐन खै
उखान आज सम्झिन्छु सोझो पुच्छर हुन्न खै ।

आओ ए शोधकर्ता हो यो राम्रो हुन्छ शीर्षक
लागेका कि कतै होलान् शोधमा जन सर्जक ।
हाम्रो यो गाउँमा यस्तै पाङ्ग्रे कुक्कुर भेट्दछु
पुरस्कार ठुलो मिल्ने राम्रो मौका म देख्दछु ।

नासाले पनि गर्ला के प्रबन्ध शोध कार्यको
बाङ्गो पुच्छर बन्नाको के तथ्य सारमेयको ।
केही लज्जा उता ढाक्छ साच्चै कुकुर हो भने
गाँस पुच्छर एकेक आफूमा मिल्दछन् भने ।

सहारा पुच्छको हुन्न बन्दैन हतियार सो
सिर्जना यसको गर्ने के दैव पुच्छरे थियो ।
मट्याङ्ग्रा यसमा हान्दा सोझो होला कि पुच्छर
गुलेली बाँड एकेक हानून् ताकेर दुच्छर ।

०००
हाल बैजनाथ १, चिसापानी, बाँके