नेपाली हास्यव्यङ्ग्य अनलाइन पत्रिका

हरिप्रसाद घिमिरे :

ॐनी लुटेका यति नै लुटेका
कोशी लुटेका सब ती जुटेका
काली लुटे फेरि सकेन फुट्न
आए लुटाहा अब फेरि लुट्न ॥१ ॥

त्यो गण्डकीको बिजुली हरायो
हेर्दैछु मैले गिरिबन्धु खायो
खायो चियाको पनि भूमि थुत्न
आए लुटाहा अब फेरि लुट्न ॥२ ॥

खै के भयो त्यो ललिता निवास
मान्छे परेछन् सब खास खास
अश्चर्य नै छैन रहेछ जुट्न
आए लुटाहा अब फेरि लुट्न ॥३ ॥

शिक्षा भयो ध्वस्त सकाउँदैछन्
बीमा भनी आज फकाउँदैछन्
सक्ने भएनन् जनता नि जुट्न
आए लुटाहा अब फेरि लुट्न ॥४ ॥

मान्छे मरे फेरिनु छैन देश
छन् टाउके झट्ट थुनौँ विशेष
तीनै जना थुन्न सकिन्छ जुट्न
आए लुटाहा अब फेरि लुट्न ॥५ ॥

चेली बसेका भय त्रास बोकी
यस्तो यहाँ चल्छ सधैँ नरोकी
अन्याय पर्दा सकिँदैन जुट्न
आए लुटाहा अब फेरि लुट्न ॥६ ॥

०००
गोरखा, हाल काठमाडौं