नेपाली हास्यव्यङ्ग्य अनलाइन पत्रिका

ईश्वर पोखरेल :

शाकाहार

जाँड खानु भएन, रक्सी खानु भएन
माछा खानु भएन, मासु खानु भएन
सञ्चो रहेनछ—
‘खान्न’ भन्नुभयो र त्यसपछि उहाँले यी सबै
खानु त के, छुनु पनि भएन ।
निष्ठाको सवालमा उहाँको अभिनन्दन गरे हुन्छ
पूजा गरे पनि हुन्छ ।
उहाँले पटकपटक
इमान, विवेक र सुशासनका पक्षमा सफत खानु भयो
र, बस्; घुस खानु भयो ।

बाइकको स्पिड

बाइकले पहिलेको जति स्पिड लिएन ?
चाबी छोराको हातमा थमाउनोस्
र, आफू पछाडि बस्नोस् ।
अझै पुगेन स्पिड ?
त्यो सिट उसको गर्लफ्रेन्डका लागि खाली गर्नोस्
र, आफू घरमै बस्नोस् ।

एटिएम काउन्टर

अचेल पैसा निकाल्न बैकको काउन्टरमा
लाइन लाग्नु पर्दैन,
यत्रतत्र एटिएम काउन्टर छ
यत्ति हो—
एटिएमबाट पैसा लिएर फर्किने कि
त्यसलाई क्षमा दिएर फर्किने भन्ने
अनुमान गर्न भने राशीफल हेर्नु पर्छ ।

०००
ललितपुर