देविका तिमिल्सिनासङ्गत विसङ्गत
लाग्छ हामी आज जीवन शूल बिताइरहेका छौँ हाम्रा सुख, शान्ति र आराम कैद छन् विनाविराम । अचाक्ली लोभ र पाप बढ्दा भन्थे श्रीकृष्णको जन्म हुन्छ तर जन्मेन कृष्ण सट्टामा जन्मियो मामा कंस ।
देविका तिमिल्सिना :
मान्छे आफैँलाई कैद गरेर
स्वतन्त्रताको सलामी चढाउँदै
भोट नामको स्वत्व अर्पेर
अन्याय चुपचाप सहिरहेको छ ।
न्यायको कुरा गर्छु भन्नेहरू
अन्यायमा परेकालाई
आफैँ अन्याय गर्ने
अभ्यास गरिरहेका छन् ।
सर्वत्र रातो राम्रो गोलभेँडाजस्तो
कहाँ हुन्छ मान्छेको मन ?
मात्र पाइन्छ
भित्र कालो छल्छाम् ।
रात पनि दिनजस्तै
झलमल्ल पार्ने कुरामात्र कुरा रहेछ
दिनलाई रातमा पो बदलेछ
कहिल्यै राम्रो नगर्नेले
राम्रोको बहानामात्र गर्यो
टाढा पारि क्षितिजमा
सबै सपना चकनाचुर भयो ।
लाग्छ हामी आज
जीवन शूल बिताइरहेका छौँ
हाम्रा सुख, शान्ति र आराम
कैद छन् विनाविराम ।
अचाक्ली लोभ र पाप बढ्दा
भन्थे श्रीकृष्णको जन्म हुन्छ
तर जन्मेन कृष्ण
सट्टामा जन्मियो मामा कंस ।
०००
‘अन्त्यको कहाँबाट सुरु हुन्छ ?’ (२०८०)
धन्यवाद मित्र ।