नेपाली हास्यव्यङ्ग्य अनलाइन पत्रिका

देविका तिमिल्सिना :

सहरका सडकहरू सोध्छन्
हामीलाई धुँवा धुलोबाट मुक्त हुने हक छ कि छैन ?
सहरका नदीहरू भन्छन्
कारखानाका फोहोर र ढलबिना स्वच्छ भएर
बग्ने हाम्रो हक हो कि होइन ?
छिन्नभिन्न तराईका जङ्गलहरू पुकारा गरिरहेछन्
हामीलाई उजाड हुनबाट रोक्न कोही सक्दैन ?
सुख्खाले छियाछिया भएका पखेराहरू एकै स्वरमा कराइरहेछन्
हामीलाई सिञ्चित हुने हक छ कि छैन ?
नाङ्गा पहाडहरू उदास भएर कराइरहेछन्
हराभरा हुने हक हाम्रो हो कि होइन ?
कणर्ालीका जनताले मागिरहेका छन् खाद्यान्न पाउने
हाम्रो हक पूरा हुन्छ कि हुँदैन ?
विदेशी बाँधले डुबानमा परेका तराईका बस्तीहरू स्वर उरालिरहेछन्
हामीलाई राज्यबाट संरक्षण मिल्छ कि मिल्दैन ?
मिचिएका सीमान्त भूमिहरू भनिरहेछन्
मातृभूमिमा फिर्ता हुने अधिकार छ कि छैन ?
विदेशिएका युवाहरूको एउटै सोधाइ छ
स्वदेशमै काम गर्ने अधिकार पाइन्छ कि पाइँदैन ?
भारतका कोठीमा नेपाली छोरीहरू आर्तनाद गरिरहेछन्
हामीलाई यो नरकबाट उत्रिने हक छ कि छैन ?
बेपत्ता पारिएका परिवारजनहरू भन्छन्
हाम्रो मान्छेको सास कि लास पाउने अधिकार हाम्रो हो कि होइन ?
हामी सोध्छौँ
जनअधिकारको प्रत्याभूति
शासनसत्ता चलाउनेसँग माग गर्नु
सर्वसाधारण जनताको अधिकार हो कि होइन ?

०००
काठमाडौं
‘अन्त्य कहाँबाट सुरु हुन्छ ?