नेपाली हास्यव्यङ्ग्य अनलाइन पत्रिका

मेघराज पौड्याल :

भन्थे पैले कृषि उपजमा देश हाम्रो प्रधान
यै माटोमा मलजल विनै पुग्छ पर्याप्त खान
बिक्री गर्थे कृषक पहिले आज जो किन्नु पर्छ
जस्तोतस्तो अनि जहरिलो अन्न खाने ठहर्छ ॥

माँगो माटो समथर धरा धान फल्ने गरा छन्
पाखा भित्तातिर सुरसिला सुन्तला दिव्य फल्छन्
खेती गर्दा मलजल गरे हुन्छ राम्रो अनाज
गर्ने भन्ने तरुण नहुदा डुब्न लाग्यो जहाज ॥

बाँडी खाने चलन अगिको वीरताले हटाए
यौटै माला जनतसँग त्यो धीरताले उनाए
पुर्खाको त्यो रुधिर पसिना बिर्सिएझैँ छ आज
जान्दा जान्दै पुलुपुलु सधैँ हेर्छ निर्धो समाज ॥

पेवा जस्तै अचल ढुकुटी खर्चँदै घुम्न जान्छन्
सालो सम्धी तनय भगिनी साथमा नित्य लान्छन्
आसेपासे पल विपलमा धूप हाल्ने धुपौरे
लान्छन् तिल्के बहर गजुवा साथमा हुन्छ मौरे ॥

ताली पिट्ने अगि पछि हुँदै हुर्किएका जहान
कर्जा खोजी समय भरिनै देशले दिन्छ खान
गर्छौँ भन्छन् तर मुलुकमा योजना छैन राम्रो
ल्यायो खायो ऋण र सुदले ढाड भाँचिन्छ हाम्रो ॥

०००

कञ्चनरूप- ७, सप्तरी