नेपाली हास्यव्यङ्ग्य अनलाइन पत्रिका

सुभाषचन्द्र देवकोटा :

शिखरमा पुग्दा,
सिन्को भाच्नु भएन ।
जमिनमा झरेपछि,
आकास थाम्ने कुरा गर्नुहुन्छ ?

शक्तिको मदमा डुब्दा,
आफन्त बाहेक अरुलाई चिन्नु भएन ।
शक्तिको नसा उत्रिएपछि,
जनतालाई सम्झिनु हुन्छ ?

डाडुपनिउँ हातमा छँदा,
आफ्नै भकारी भर्नु भयो ।
भन्छाको चौकीबाट तल झरेपछि
सुशासनको कुरा गर्नु हुन्छ ?

शिखर पुग्न,
सबैको पाउ मोल्नु भयो,
घर, घर चहार्नु भयो ।
आज तल गुल्टेपछि,
स्वाभिमान ढोग गर्नुहुन्छ?

सत्ता र शक्तिमा हुँदा,
धूर्त स्याल बन्नु भयो ।
आज भुइँमा पछारिएपछि,
बाघ भएको नक्कल गर्नु हुन्छ ।

पैले दैलो देख्नु भएन,
दैलोमा नै बिस्ट्याउनु भयो ।
सिनो जस्तो गनाएपछि,
आज गोहीको आँसु झर्नु हुन्छ ।

०००
गोरखा, हाल काठमाडौं